Ганцаардал гэдэг нь заавал сул тал биш. Харин ч хүн өөрийгөө таних, хөгжүүлэх боломжийн нэг гэж сэтгэл судлаачид үздэг. Хамгийн гол нь энэ мэдрэмжийг хэрхэн хүлээж авах, хэрхэн зөвөөр даван туулах гэдэг чухал юм. Ингээд ганцаардлыг эрч хүч болгон хувиргах 5 зөвлөмжийг хүргэж байна:
- Өөртөө зөөлөн, эелдэг ханд
Ганцаардаж буй үед өөрийгөө шүүмжилж, буруутгахын оронд сэтгэл зүйгээрээ түшиж, өөртэйгөө эелдгээр харьц. Хүнд хэцүү үед бусдад ханддаг уян зөөлөн байдлаа өөртөө ч бас зориул. Чимээгүй цаг гаргаж, рашаанд явах, байгальд алхах гэх мэт өөрийгөө дэмжих алхмуудыг хий. -
Бодит харилцааг эрхэмлэ
Цахим орчноос түр холдож, бодит ертөнцөд хүмүүсийн нүд рүү харж, инээмсэглэл, дохио зангаа мэдрэх харилцааг эрэлхийл. Найзтайгаа уулзах, танил хүнтэй товч яриа өрнүүлэх ч гэсэн таны дотоод мэдрэмжийг тэнцвэржүүлнэ. -
Хувийн цагийг утгатай өнгөрүүл
Ганцаардал дунд өөрт таалагддаг зүйлээ хийх нь хамгийн сайн “эм”. Дуртай кино үзэх, ном унших, бүтээлч ажил хийх зэрэг нь ганцаардлыг бүтээлч байдал болгож хувиргадаг. Та ганцаар байсан ч холбогдож болох олон арга бий. -
Жижиг харилцааг ч бүү бас
Ганцаараа кофе ууж суухдаа зөөгчтэй инээмсэглэл солилцох, дэлгүүрийн худалдагчтай ганц хоёр үг сольсноор бид бусадтай холбогдож буйгаа мэдэрдэг. Эдгээр энгийн харилцаа таны сэтгэлд гэрэл нэмнэ. -
Дотоод яриагаа эерэг болгож сур
Ганцаардлын үед тархинд эргэлдэх дуугүй яриа ихэвчлэн шүүмжлэл, сөрөг бодлоор дүүрэн байдаг. Үүнийг хянаж, өөртэйгөө ярилцахдаа дэмжлэгтэй, урам өгсөн өнгөөр хандах нь сэтгэл зүйг эерэг чигт чиглүүлдэг чухал алхам юм.
Ганцаардал гэдэг сэтгэл зүйн дохио — таныг өөртөө анхаарах цаг болсныг хэлж байдаг. Тиймээс энэ мэдрэмжийг айдас бус, боломж гэж харж чадвал өөрийгөө илүү гүн таньж, илүү хүчтэй нэгэн болон хувирна.
