Хятадын Pang Dong Lai нэртэй компани “сэтгэл гуньсан чөлөө” хэмээх шинэ бодлогоо албан ёсоор хэрэгжүүлж эхэлжээ. Энэ бодлогын дагуу ажилтнууд сэтгэл санаагаар унасан үедээ шалтгаан тайлбарлах шаардлагагүйгээр ажлаасаа чөлөө авах боломжтой болсон байна.
South China Morning Post-ын мэдээлснээр уг санаачилгыг тус компанийн үүсгэн байгуулагч, дарга Ю Дунлай 2024 оны 3-р сард болсон “China Supermarket Week”-ийн үеэр зарлажээ. Одоо ажилтнууд жил бүр 10 хүртэл хоногийн “сэтгэл гуньсан чөлөө” авах эрхтэй бөгөөд үүнд удирдлагын зөвшөөрөл шаардахгүй.
Энэ арга хэмжээ нь “эрх чөлөө ба хайр” гэсэн Pang Dong Lai компанийн өргөн хүрээний философийн нэг хэсэг бөгөөд сэтгэцийн эрүүл мэнд, ажил амьдралын тэнцвэрийг дэмжих зорилготой. Тус компани аль хэдийн өдөрт 7 цагийн ажлын цаг, амралтын өдрүүд, жилийн 30–40 хоногийн амралт, мөн Цагаан сараар 5 хоногийн чөлөө олгодог байна. Үүнээс гадна цэвэрлэгч зэрэг анхан шатны ажилтнууд ч гүйцэтгэлийн шалгуураа биелүүлбэл жилдээ 500,000 юань (ойролцоогоор 70,000 ам.доллар) хүртэл цалин авах боломжтой.
Энэ бодлого Хятадын нийгмийн сүлжээнд өргөн дэмжлэг хүлээж, олон хүн компанийг Хятадын “996” буюу өглөө 9-өөс орой 9 хүртэл, 6 өдөр ажиллах хүнд хэцүү соёлд сор болгон тавьж байна гэж сайшаажээ. Ажилтнууддаа сэтгэл санааны сайн сайхан байдлаа нэгдүгээрт тавих эрх чөлөө олгосноор, Pang Dong Lai нь Хятадад төдийгүй дэлхийн хэмжээнд уламжлалт корпорацийн хэвшмэл ойлголтыг сорьсон зоригтой жишээ болж байна.
Эх сурвалж: South China Morning Post: “‘Not happy, do not come to work’: China retail tycoon introduces ‘unhappy leave
