Сүүлийн үеийн нэгэн судалгаагаар хар шоколад болон кофенд байгалийн гаралтайгаар агуулагддаг теобромин хэмээх нэгдэл нь эсийн хөгшрөлтийг удаашруулахтай холбоотой байж болохыг тогтоожээ. Судалгааны үр дүнг ScienceDaily мэдээлсэн байна.
Их Британийн King’s College London-ийн судлаачид 1,600 гаруй насанд хүрсэн хүний цусанд агуулагдах бодисуудыг шинжилж, теобромины түвшин өндөр хүмүүсийн биологийн нас бодит наснаасаа залуу харагдаж байгааг илрүүлсэн байна. Тэдгээр хүмүүсийн ДНХ-ийн зарим үзүүлэлт илүү эрүүл байж, эсийн хөгшрөлттэй шууд холбоотой теломерийн урт харьцангуй удаан богиносож байжээ.
Earth.com-ын мэдээлснээр теобромин нь какао шош болон кофенд байгалийн жамаараа агуулагддаг ургамлын гаралтай химийн нэгдэл бөгөөд хар шоколаданд байдаг үл ялиг гашуун амтыг үүсгэдэг бодис юм. Судалгаанд хамрагдсан хүмүүсийн хувьд энэхүү нэгдэл өндөр байх тусам эс, эдийн түвшинд илүү тогтвортой байдал ажиглагдсан нь анхаарал татсан байна.
Гэсэн хэдий ч эрдэмтэд теоброминыг урт наслах “ид шидийн шийдэл” гэж ойлгож болохгүйг онцолжээ. SciTechDaily-ийн мэдээлснээр энэхүү нэгдэл нь зөв хооллолт, идэвхтэй хөдөлгөөн, эрүүл амьдралын хэв маягтай хослох үед хөгшрөлтийн зарим шинжийг удаашруулахад дэмжих үүрэг гүйцэтгэж магадгүй аж.
Судлаачид цаашид теобромин хүний биед яг ямар механизмаар нөлөөлж байгааг илүү нарийвчлан судлах шаардлагатай гэж үзэж байгаа ч энэхүү нэгдэл болон биологийн хөгшрөлтийн хоорондын хамаарал бодит өгөгдлөөр батлагдаж эхэлснийг онцолсон байна.
Энэхүү мэдээлэл нь зөвхөн ерөнхий мэдээ, мэдээлэл өгөх зорилготой бөгөөд мэргэжлийн эмчийн зөвлөгөөг орлохгүй. Эрүүл мэндийн асуудалтай бол эмч эсвэл мэргэжлийн байгууллагад хандахыг зөвлөж байна. Манай мэдээллийг авах, гээхийн ухаантай уншаарай. Танд талархлаа.
Анхааруулга: Дагалдах зураг нь хиймэл оюунаар бүтээсэн бөгөөд зөвхөн дүрслэх зорилготой болно.
Эх сурвалж: ScienceDaily
